Innrita

Signaður bíbliulestur

Heimatíðindi

Signaður bíbliulestur

Innlagt av Redaktiónini    tann: 10.11.2017  



Átrúnaður

Effie Campbell hevur umsett.

Helge Skaaheim frá Jesus Nett hevur eina sending á Visjon Norge, sum eitur “Trygg tro”. Ein dagin var Hans Johan Sagrusten, teologur, prestur og skald, og sum eisini er tað, norðmenn nevna “bibelbrukskonsulent i Det Norske Bibelselskap”, gestur hansara. Sagrusten greiddi frá ymsum, sum hann hevði upplivað, tá ið hann í bíbliuørindum ferðaðist kring um í heiminum:


Tá ið eg ferðaðist um í Kina, upplivdi eg eitt, sum segði mær, hvussu máttmikið Guds orð er, tað er sterkari, enn tú og eg geva okkum far um í dagliga lívinum. Ein kona var ógvuliga sjúk. Tað var onkur blóðsjúka, henni feilti; men eg fekk ikki fatur á akkurát, hvør blóðsjúka tað var. Hon hevði frætt, at longur uppi í dalinum vóru eini kristin hjún, sum bóðu fyri sjúkum. Hóast hon var veik, fór hon til gongu hagar. Hjúnini bóðu fyri henni, og hon varð so líðandi grødd.
Henda konan fór nú saman við manni sínum at lesa hvønn dag í Bíbliuni einar tveir kapitlar. Tey lósu hart og tosaðu um tað, tey høvdu lisið. So vildu grannarnir eisini sleppa upp í bíbliubólkin, og vinfólk og familja løgdust eisini afturat, og skjótt gjørdust tey so nógv, at tey máttu byggja eina kirkju, tí tey rúmaðust ikki í einum privatum heimi. Nú eru 1000 fólk í hesum kirkjuliði. Hetta var eingin prestur ella trúboðari, men eini vanlig hjún, sum vóru upphav til hesa bíbliuvekingina.


Um tú vilt gera bíbliulesturin til okkurt, tú rættiliga fært gagn úr, so skal tú lesa soleiðis: 1) Hvønn dag 2) Tú skalt halda á við lestrinum, har tú slepti í gjár, altso tú skalt lesa samanhangandi 3) Tú skalt lesa hart saman við onkrum. Hetta hjálpir tær at halda teg vakna. Sløkk fartelduna og fartelefonina. Bíbliulesturin hevur størri týdning, hann gevur tær saft og kraft at ganga á Himmalvegnum, og nú nærkast tíðin, tá ið Jesus kemur eftir teimum trúgvandi.
Eg var og ferðaðist á Kuba. Har hava teir sett ein bisp, sum burturav skal taka sær av bíbliulestri. Bispurin kom við hesum ráðum: Tá ið tú ert liðugur at lesa í dag, skalt tú ikki lata Bíbliuna aftur, nei, hon skal liggja opin á stovuborðinum. So kanst tú í morgin halda áfram við lestrinum, har tú slepti. Tá ið tú kemur fram við hesi opnu Bíbliu gjøgnum dagin, fært tú kanska hug at lesa nøkur vers. Tú vitnar eisini fyri teimum, sum støkka inn á gólvið hjá tær, tí tey síggja, at hetta er eitt heim, har Bíblian er ein opin bók, og hetta húskið hevur Jesus í miðdeplinum.
Hvar skal ein so byrja bíbliulesturin, á síðu eitt sum í øðrum bókum? Nei, byrja við Markusar Evangeliið, tað er tað stytsta, og har fært tú eina klárliga mynd av Jesusi. So kanst tú halda á við Jóhannes, Lukas, Ápostlasøguni, Efesarabrævið, og inn ímillum kanst tú lesa úr Sálmunum, endaði Hans Johan Sagrusten samrøðuna.


Effie Campbell.

© Sandportal - Sandoyarportalurin
Aftur