Innrita

Kostar ov nógv at hava tvær ferjur um fjørðin

Heimatíðindi

Kostar ov nógv at hava tvær ferjur um fjørðin

Innlagt av Redaktiónini    tann: 01.12.2017  



Politikkur, Heimatíðindi

Á tingfundi 18. oktober 2017 boðaði tingformaðurin frá omanfyrinevnda fyrispurningi, frá Gerhard Lognberg sum varð soljóðandi:

1. Hvat ætlar landsstýrismaðurin at gera fyri at tryggja Teistanum eitt avloyaraskip, um skipið fær trupulleikar?


2.      Hvørjir eru møguleikarnir at fáa eitt skip, sum kann sigla fast saman við Teistanum?

Og Hendrik Old, landsstýrismaður hevur nú svarað hesum spurningi:


Svar upp á spurning 1

Landsstýrismaðurin hevur støðugt í huganum, hvussu skipaflotin hjá SSL kann røkja lógarásettu flutningsskylduna á besta hátt, og samanumtikið heldur hann hesa skylduna verða væl røkta, hóast fleiri av skipunum eru lutfalsliga gomul, og SSL einki eykaskip hevur.


Eru skip hjá SSL fyri óhappi, er tað altíð ein avbjóðing - ikki minst hjá Teistanum á Sandoyarleiðini, tí hendir eitt óhapp frá september til apríl ber ikki til at seta Ternuna inn á Skopunarfjørð uttan so, at undantak fæst frá Sjóvinnustýrinum, og SSL fær útvega eitt eykaskip at seta inn á Nólsoyarleiðina.


Ternan hevur bert loyvi til at sigla í Skopunarfirði frá mai til august, tá ið Skopunarfjørður er flokkaður sum c-øki.


Spyrjarin sigur í viðmerkingunum, at uppbýtið í a-, b- og c-økir er sambært Stokkhólmsavtaluni. Men hetta er ikki rætt, tí nevnda avtala snýr seg um stabilitet, og hesar ásetingar uppfyllir Teistin.


Eisini sigur spyrjarin Skopunarfjørð vera c-øki, men tað má vera ein misskiljing, tí í átta mánaðar er fjørðurin b-øki, og so í fýra mánaðar um summarið er fjørðurin c-øki. Nólsoyarfjørður er c-øki alt árið.


SSL kann søkja Sjóvinnustýrið um ‘undantaksloyvi við ávísum avmarkingum’, um Ternan brádliga má loysa Teistan av, meðan Skopunarfjørður er b-øki, og um eykabátur annars er tøkur at seta inn á Nólsoyarleiðina. SSL fekk t.d slíkt loyvi, tá ið Teistin bar við land á Gomlurætt í fjør, meðan loyvi ikki fekst, tá ið Teistin harfyri var fyri óhappi og lá ein fyrrapart, tí veðrið var ov vánaligt.


Hóast privatir eykabátar onkuntíð eru til taks í landinum, eru tað ov nógvar óvissur við hesi skipan. Arbeitt verður tí í løtuni fyri eini meiri varandi skipan, og landsstýrismaðurin vónar at kunna boða nærri frá hesum út ímóti vári. Vónin er, at SSL tá kunnu seta skjótan eykabát at sigla t.d túrar, um onkrum av vanligum ferjunum berst frá.


Svar upp á spurning 2

Við nýggju bókingarskipanini, ið SSL hevur sett í verk á Gomlurætt, fer ferðingin og ferðslan av Gomlurætt til Skopunar at verða smidligari, tí ferðandi nýtast nú ikki at koma á staðið, fyrr enn teirra túrur skal siglast. Væntandi fer kapasiteturin hjá Teistanum nú at verða enn betur brúktur, tí sæð yvir alt samdøgrið er skipið nóg stórt.


Vónin er eisini, at bókingarskipanin skjótt kann verða sett í verk í Skopun, tí hetta vildi uttan iva hjálpt upp á bíðirøðirnar av bilum til dømis í vikuskiftinum.


Landsstýrismaðurin er av tí sannføring, at Teistin er eitt framúr væl útgjørt skip, og tað munnu vera fáar ferjur, sum eru so væl útgjørdar. Til dømis eru 5 høvuðsmotorar umframt 1 hjálpimotorur (eisini nevndur havnagenerator ella ljósmotorur), sum kann setast til skrúvurnar, um høvuðsmotorarnir skuldu steðga. Eisini er ein neyðgenerator. Vanliga brúkar Testin 3 høvuðsmotorar, sum er krav til havnamanøvrur. 1 motorur er altíð stand-by. Hetta er alt ein stórur tryggleiki fyri ferðandi við Teistanum. Treyðugt so kann okkurt henda, sum hevur við sær, at onkur túrur ikki verður sigldur.


Sama støða er við Smyrli og øðrum skipum hjá SSL.


Tað hevði verið ein rættiliga dýr loysn at havt tvey skip siglandi um Skopunarfjørð, og tá ið tað varð roynt seinast - í 2008 og 2009 - riggaði tað ikki væl. Ternan var tá annað skipið, men flestu ferðafólk valdu at brúka Teistan, tí hann ber seg betur á fjørðinum. Skal SSL havt eitt skip aftrat til Sandoyarleiðina, má tað serbyggjast, og tað finst einki slíkt leiguskip.

Málið avgreitt

© Sandportal - Sandoyarportalurin
Aftur